கொடுக்கல், வாங்கல், சமூக உறவுகள் தொடர்பானவை. - மஹ்ரமிகளின் விபரம்

Last Updated (Sunday, 02 November 2008 07:13) Thursday, 30 October 2008 08:56

கேள்வி: சிற்றப்பா, சிற்றன்னை, பெரியப்பா, பெரியம்மா ஆகியோரின் பெண்பிள்ளைகளோடு மஹ்ரமிய்யத்தான தொடர்புகள் வைத்துக் கொள்ளத் தடையுண்டா? அவர்களைத் திரையின்றி பார்ப்பது கூடாதா? திருமணம் செய்ய முடியாதா? விளக்கம் தேவை.

பதில்: ஒருவரின் பெரியம்மா, பெரியப்பா, சிற்றப்பா, சிற்றன்னை, ஆகியோரின் பிள்ளைகள் அவருக்கு மஹ்ரமிய்யத் ஆனவர்கள் அல்ல. எனவே, குறித்த நபர்களைத் திரையின்றிப் பார்ப்பதற்கு அனுமதியில்லை. திருமணம் செய்து கொள்ளத் தடையுமில்லை.

கீழ்வரும் குர்ஆன் வசனங்கள் மஹ்ரமிகளை வரையறுத்துக் கூறுகின்றன. அவற்றில் நீங்கள் குறிப்பிடுவோர் இடம் பெறாமையை அவதானிக்கலாம்.

'முன்னர் கடந்து போன சம்பவங்களைத் தவிர, நீங்கள் உங்கள் தந்தைகள் மணம் செய்து கொண்ட பெண்களில் எவரையும் மணம் செய்து கொள்ளாதீர்கள். நிச்சயமாக இது மானக்கேடானதாகவும், வெறுக்கத் தக்கதாகவும், தீய வழியாகவும் இருக்கின்றது.'

'உங்கள் தாய்மார்களும், உங்கள் புதல்விகளும், உங்கள் சகோதரிகளும், உங்கள் தகப்பனின் சகோதரிகளும், உங்கள் தாயின் சகோதரிகளும், உங்கள் சகோதரனின் புதல்விகளும், உங்கள் சகோதரியின் புதல்விகளும், உங்களுக்குப் பாலூட்டிய உங்கள் செவிலித் தாய்மார்களும், உங்கள் பால் குடி சகோதரிகளும், உங்கள் மனைவிகளின் தாய்மார்களும் (ஆகிய இவர்களை நீங்கள் திருமணம் செய்துகொள்வது உங்களுக்கு விலக்கப்பட்டுள்ளது. அவ்வாறே நீங்கள் வீடு கூடிய மனைவிக்கு முந்திய கணவனிடத்துப் பிறந்து, உங்களிடம் வளர்ந்து வரும (மனைவியின்) மகளையும், (நீங்கள் திருமணம் செய்வது கூடாது) ஆனால், அவளுடன் வீடு கூடாதிருந்தால் (அவளை நீக்கி விட்டு அவளுக்கு முந்திய கணவனிடத்துப் பிறந்த மகளைத்திருமணம் செய்து கொள்வது) உங்கள் மீது குற்றமில்லை. உங்களுக்குப் பிறந்த உங்கள் புதல்வர்களின் மனைவிகளையும் (நீங்கள்திருமணம் முடிக்கலாகாது) இரு சகோதரிகளை (ஒரே காலத்தில் மனைவிகளாக) ஒன்று சேர்த்து வைப்பதும் (விலக்கப்பட்டுள்ளது) இதற்கு முன்னர் கடந்து விட்டவைகளைத் தவிர நிச்சயமாக அல்லாஹ் மன்னிப்போனும் கிருபையுடையவனுமாக இருக்கின்றான்!' (4:22, 23)